Apuntes de PLATÓN
*NOTA: As comparacións aparecen destacadas en azul e
as opinións en verde.
INTRODUCIÓN:
CONTEXTO HISTÓRICO, BIOGRAFÍA E OBRA
Como consecuencia no s.V a.C. do triunfo
dos gregos fronte a Persia nas Guerras Médicas, Atenas adquiriu a hexemonía
económica, cultural e política da “Hélade”, nome co que se coñecía antigamente
a Grecia. As institucións atenienses, baixo a dirección política de Pericles,
foron imitadas polo resto das pólis,
o comercio marítimo floreceu entre as colonias do Mediterráneo e unha época de
paz e prosperidade estendeuse ata o 431 a. C.
Pero a partir deste ano, por unha
banda, as rivalidades xurdidas entre varias cidades asociadas con Atenas e, por
outra, a pugna interna entre as tendencias democráticas e oligárquicas en
moitas delas deron orixe ás Guerras do Peloponeso. As distintas cidades
gregas, agrupadas en torno a Atenas e Esparta, enfrontáronse entre si
nunha guerra na que finalmente Esparta resultou vencedora e, apoiándose
na súa alianza con Persia, impuxo en Atenas un sistema oligárquico, o réxime
dos Trinta Tiranos.
Pero esta situación non logrou
establecer unha paz duradeira, xurdindo de seguida novos conflitos tralos que o
dominio de Esparta foi substituído polo de Tebas, que tamén durou pouco.
Todo isto provocou o empobrecemento da Hélade e nun prazo moi breve, o surximento
do Imperio de Macedonia.
Macedonia era unha rexión situada ao norte de Grecia, considerada
bárbara por non pertencer á comunidade helénica, pero que da man do sei rei,
Filipo II, converteuse na segunda metade do s. IV a. C. nunha gran potencia,
absorbendo a toda Grecia trala batalla de Queronea (donde derrotou a Tebas e a
Atenas), desaparecendo para sempre deste xeito o réxime da Cidade-Estado.
PLATÓN naceu ao comezo das guerras do
Peloponeso, conflito que durou 27 anos e marcou o final do dourado s. V a.C.
de Grecia, polo que a Platón lle tocou vivir un momento de gran
inestabilidade: foi testigo da degradación da democracia de Pericles, do
goberno autoritario imposto por Esparta e formado polos Trinta Tiranos (entre
os que se atopaban dous tios de Platón: Cármines e Crítias), e da democracia
posterior que condenou a Sócrates.
Platón recibiu unha educación
privilexiada, xa que pertencía a unha familia aristocrática. Coñeceu con vinte
anos a Sócrates e fíxose discípulo incondicional seu, do que escribiu que "é o
home máis bo e xusto que xamais existiu". Coa morte do seu admirado
mestre viuse obrigado, como discípulo e amigo, a marchar de Atenas. Foi a Megara, onde estudou co filósofo parmenídeo Euclides e despois a Tarento, onde coñeceu ao pitagórico Arquites, que gobernaba a
cidade, feito que lle convenceu de que os problemas da sociedade non se
acabarían ata que non gobernasen os filósofos ou os reis aprendesen filosofía.
El mesmo intentou poñer en práctica esta idea en Siracusa, xa que o tirano
Dionisio I lle amosou un interese pola filosofía que despois resultaría ser
falso, polo que Platón acabou sendo expulsado e vendido como escravo. Rescatado
por un coñecido, volveu a Atenas e fundou a Academia, institución
dedicada ao estudo e ensino da filosofía e das ciencias, que perviviu, con
enormes variacións na súa organización e na súa doutrina, ata que no s. VI d.C.
foi clausurada polo emperador bizantino Xustiniano. O seu nome é en
honor ao seu concidadán Academus, quen lle permitiu fundar a escola nos seus
xardíns.
Hai que dicir que a morte de Sócrates influíu de
modo decisivo, case traumático, na vida e na obra de Platón. Sócrates, modelo
de persoa xusta e virtuosa, foi condenado a morte nun xuízo no que a sentenza
foi decidida por un xurado composto por 500 concidadáns seus, elixidos de forma
aleatoria. O propio Platón, presente en devandito xuízo, puido comprobar que se
cumpriron as leis que tanto el mesmo como o propio Sócrates consideraban
xustas, e con todo, aos seus ollos esta condena era tremendamente inxusta. Este
feito fixo que Platón, que tanto pola súa ascendencia familiar como pola súa
propia vocación (afirmada na súa Carta VII) estaba destinado a participar nas
maxistraturas públicas e no goberno de Atenas, decidise afastarse temporalmente da actividade pública e retirarse a filosofar
sobre o ben e o mal, a virtude, a xustiza e a organización socio-política en
xeral.
A OBRA PLATÓNICA é considerada unha profunda meditación
sobre cuestións políticas, xa que Platón foi
principalmente un pensador político
que intentou diseñar o sistema político
ideal fronte aos Estados “enfermos” do seu tempo, e renovar a cidade de
Atenas, pervertida polo vicio e a corrupción, a ignorancia da demo
(pobo) e a demagoxia dos poderosos.
Considérase que as
súas teorías ontolóxicas,
epistemolóxicas e antropolóxicas están orientadas a fundamentar os seus ideais políticos.
Respecto da forma literaria das súas obras, Platón,
tanto por influencia socrática como pola experiencia democrática vivida, expresou
os seus pensamentos mediante o diálogo, pois opinaba que era unha
forma viva de filosofar que mediante
preguntas e respostas, aclaracións e refutacións, conducía a investigación ata
a verdade, poñendo de manifesto a súa concepción da filosofía como actividade crítica.
En xeral, a maioría dos diálogos
enfocan unha cuestión ou tema,
refutan as opinións falsas, e tralo proceso maiéutico, rematan co
descubrimento da verdade. Case todos os personaxes
que Platón fai intervir nos seus diálogos son reais, aínda que frecuentemente recorre a situacións anacrónicas situando aos interlocutores fóra do seu
tempo. O protagonista principal é Sócrates, que, mediante unha
inxenuidade finxida (ironía socrática), vai refutando as posicións dos seus
interlocutores, frecuentemente dos sofistas, que, aos ollos de Platón, non fan
senón confundir á mocidade cos seus sofismas (falacias, razoamentos
falsos con aparencia de verdade).
Non se sabe con exactitude cando
comezou a escribir, pero parece que foi despois da morte de Sócrates, por unha
parte, para defender a súa memoria en contra daqueles que o confundían
cun sofista máis, culpable da crise espiritual e social de Atenas; e por outra
parte, pola influencia socrática de que o filósofo ten que estar ao
servizo da polis, dedicándose persoalmente como fixo Sócrates ou
escribindo tratados que marquen un ideal.
Atribúense a Platón numerosos diálogos, ordenados polos tratadistas
principais cronolóxicamente en catro períodos. O primeiro período está
constituído polos “Primeiros diálogos
ou diálogos socráticos”, que
conteñen principalmente preocupacións éticas, destacando
Apoloxía de Sócrates (discurso monolóxico de defensa de Sócrates ante os
xuíces) e Critón (diálogo
cun dos seus mellores amigos, mentres está esperando á morte no cárcere). O segundo período é denominado “Época
de transición ou antisofista” e contén os primeiros diálogos da Academia.
Neles continúan as cuestións éticas, pero cobran tamén intensidade os problemas
políticos, así como os temas relacionados coa preexistencia e
inmortalidade da alma humana. Entre os máis importantes deste período
atópanse Gorxias e Menón. O
terceiro período é denominado “Época de madurez ou diálogos
doctrinais”, xa que neles formula
a “teoría das ideas” como fundamento das teses ético-políticas, e a teoría da reminiscencia; destacan Banquete,
Fedón, República e Fedro. E por último, o cuarto período é conformado polos
“Diálogos de vellez ou diálogos críticos”, denominados así porque neles Platón somete a revisión as
súas propias ideas; podemos sinalar como os máis importantes Leis e Crítias.
Nas súas obras, Platón empregou
frecuentemente o mito para expresar as súas teorías. Son relatos procedentes
da tradición relixiosa grega que utiliza como parábolas, imaxes ou exemplos,
co fin de facilitar a comprensión dos temas tratados. Os máis significativos
son o Mito da caverna (Libro VII da República) e o Mito do carro alado (Fedro).
Co primeiro expresa ao mesmo tempo a teoría do coñecemento e a situación
dos seres humanos no mundo sensible. Platón relata, por boca de Sócrates e
Glaucón (irmán de Platón), a existencia duns homes cautivos desde o seu
nacemento no interior dunha escura caverna. Están atados de pernas e pescozo
con cadeas, de maneira que teñen que mirar sempre adiante. A única luz
existente nesta caverna emana dun lume encendido detrás deles, elevado e
distante. Entre o lume e os encadeados hai un camiño elevado ao longo do cal
construiuse un muro e por este camiño pasan uns homes falando e levando todo
tipo de figuras que lles sobrepasan. Os cautivos non poden ver nada máis que as
sombras proxectadas polo lume no fondo da caverna, polo que cren que aquelo que
ven non son sombras, senón obxectos reais, e que son as sombras dos obxectos as
que falan. Platón explica que se un dos cautivos fose liberado e salise ao
mundo exterior, tería graves dificultades para adaptarse á luz deslumbradora do
sol e acostumarse a mirar os obxectos mesmos, ata descubrir toda a beleza do
cosmos. Pero se unha vez logrado isto, o prisioneiro entrase outra vez na
caverna para descubrirlles o engano no que viven, tomaríanlle por tolo.
Incluso, se intentase desatalos e levalos ata a entrada da caverna, os
prisioneros, ignorantes e violentos, o matarían.
No segundo, o Mito
do carro alado, expón a caída das almas
e a relación das diferentes clases ou
partes de almas entre si. Consiste nunha procesión encabezada polos deuses
na que as almas ascenden fóra do universo, ao lugar supraceleste, para
contemplar as Ideas. Neste mito, cada alma é representada como un carro
alado dirixido por un auriga (que simboliza a parte racional) do que
tiran dous cabalos, un branco e belo (que simboliza a valentía e a forza
de vontade, a parte irascible da alma), e outro negro e deforme (que
simboliza o desexo e a paixón polo sensible, a parte concupiscible da alma). O
carro é difícil de gobernar, dada a tendencia do cabalo negro a desviarse do
camiño, o que provoca que a alma se precipite desde o mundo intelixible ao
sensible, quedando así presa no corpo. A labor
do filósofo será facer que a alma desperte ao recordar a súa situación
anterior de contacto coas ideas, liberándose do sensible. Esta liberación só
coñece un camiño, o da reminiscencia
ou recordo entendido como o progresivo regreso ascendente da alma á
verdade do intelixible a través do coñecemento.
METAFÍSICA
(Ontoloxía): O Mito da Caverna constitúe un claro exemplo da súa concepción ontolóxica dualista, xa que
defende a existencia de dous
mundos ou realidades: o
mundo sensible, que é un mundo aparente, de sombras; e o mundo intelixible ou mundo das Ideas,
que constitúe a auténtica realidade. Mentres o primeiro está formado polas
cousas múltiples, cambiantes e continxentes (cousas físicas, naturais e artísticas
ou articiais), o segundo é o das esencias inmutables ou seres verdadeiros,
perfectos (Ideas e números). Con isto, Platón intentou conxugar as teorías de Heráclito
de Éfeso (tódalas cousas están sometidas a constante variación e cambio: “Panta
rei", todo flúe) e Parménides de Elea (o Ser é un, inmutable,
eterno, perfecto, etc)
Doutra banda, Sócrates ensinoulle que
nas cousas singulares e concretas sometidas ao cambio existe unha esencia
universal, invariable e común a todos os entes dunha mesma
especie, que expresa o verdadeiro ser das cousas. Esta esencia, se para
Sócrates era inmanente ou interna ás cousas mesmas, para Platón é
trascendente, pois dáse no mundo intelixible.
A “TEORÍA DAS
IDEAS” constitúe o núcleo central da
filosofía platónica e nela se fundamentan
as súas teorías epistemolóxicas, antropolóxicas, éticas e políticas. Esta “teoría
das Ideas” nunca foi considerada
polo autor definitivamente acabada,
sendo revisada reiteradamente nos
seus diálogos de vellez.
Segundo esta teoría, as Ideas son o
auténtico ser, a verdadeira realidade, de tal modo que fronte a elas toda
outra realidade é degradada e deficiente. As Ideas son imperecedeiras, inmutables, eternas, independentes e separadas de todos
os obxectos materiais. Pero as Ideas non son simples conceptos abstractos,
senón realidades que existen con independencia das cousas e que só son
captables polo entendemento ou razón. Trátase dunha realidade intelixible, non sensible, non captada polos sentidos,
polo que o seu lugar propio e adecuado é o mundo intelixible, que se atopa máis
aló do ceo, fóra do universo, nun mundo supraceleste.
Estas ideas poden ser de
realidades éticas e estéticas (idea de xustiza, virtude...), de relacións e
proporcións (idea da unidade e a pluralidade...), de seres naturais e
artificiais (ideas de cabalo, mesa...), incluso de cousas negativas ou
repugnantes (de suciedade, piollos...), xa que a cada clase de obxectos e
relacións do mundo sensible lle corresponde no mundo intelixible a súa idea
propia e adecuada. Pero non todas as Ideas son iguais, polo que Platón di que o
mundo das Ideas posúe unha estrutura piramidal de acordo cos diferentes
niveis de ser, segundo a cal unhas Ideas
son inferiores e dependen doutras superiores. Así por exemplo, a Idea de "can" participa doutras
Ideas superiores, as de "animal", "mamífero" ou
"carnívoro" e á vez, a idea de "animal" participa de
"ser vivinte", "ser sensible"… ata chegar á Idea Suprema,
a Idea de Ben, que constitúe a cúspide
da pirámide, a realidade superior da que depende toda outra realidade
(ideas e cousas).
A Idea de Ben é un trascendental, é dicir, algo
que sendo en si mesmo é, ao mesmo tempo,
en todas as demais realidades. Deste modo, o resto dos seres posuirán
realidade en tanto neles dáse a Idea de Ben.
É curioso que en Platón a idea de Ben estea por riba da
Idea de Ser, que parecería loxicamente a máis xeral. Isto débese a que polo seu
pitagorismo identifica o Ben coa Orde, e a existencia das Ideas e, en
definitiva, de todo, depende da existencia desta "Orde" xerárquica.
Como as Ideas son a auténtica
realidade, posúen un sentido ontolóxico e de modo derivado, un significado
lóxico. No seu sentido ontolóxico,
as Ideas constitúen a esencia, xa que o auténtico ser das cousas atópase
nas súas ideas (por exemplo, o verdadeiro cabalo non é o que corre no
hipódromo, senón o que está contido na idea de cabalo). Son ademais a causa
exemplar ou modelo de todas as cousas, pois as cousas imitan ou participan
das Ideas (por exemplo, o cabalo que corre no hipódromo é cabalo na medida en
que se parece á Idea de cabalo). E por último son a causa final, pois
todas as cousas tenden cara ás Ideas aínda que xamais chegarán a elas, xa que
un obxecto particular non pode compararse cunha Idea, pois está sometido ao
espazo e o tempo, a variabilidade e o cambio. Así, por exemplo, todos os
cabalos fanse mellores canto máis se asemellan ao cabalo ideal. No seu sentido lóxico, as Ideas
constitúen o concepto universal, é dicir, un concepto que se refire a
unha pluralidade de obxectos da mesma especie (por exemplo, o concepto
"cabalo" designa a todos os cabalos existentes).
As cousas son o que son en tanto que "se parecen" ás Ideas
das cales son copia, polo que non
constitúen verdadeiras realidades, senón simples
aparencias ou imitacións mal feitas. Platón fala de participación e imitación
para describir a relación entre as cousas sensibles e as Ideas: estas cousas participan
das Ideas e aseméllanse a elas.
Toda
esta “Teoría das Ideas” será criticada polo discípulo máis aventaxado de
Platón, Aristóteles, quen botará por terra o mundo intelixible de Platón,
afirmando coa súa mentalidade
naturalista que o único mundo que existe é o sensible e que as Ideas non son
máis que elaboracións mentais froito dun traballo de abstracción que parte das
cousas concretas.
COSMOLOXÍA:
O SURXIMENTO DO MUNDO (Timeo). Platón vese
obrigado a explicar a existencia das cousas sensibles, polo que no seu diálogo Timeo
(nome do sabio pitagórico en boca do
que pón a narración cosmolóxica
platónica), explica como o mundo sensible foi realizado polo Demiurgo,
quen, tendo en conta a realidade intelixible, proporcionou a forma adecuada a
unha materia preexistente. Polo tanto, no nacemento do mundo interveñen tres
realidades: o Demiurgo, as Ideas e unha materia indeterminada e preexistente.
O Demiurgo vén ser como un Deus "facedor ou ordenador" que na
súa obra de creación serviuse doutras realidades que xa existían antes e, así,
utilizando a materia preexistente, imitando as Ideas e seguindo unhas formas
xeométricas (pitagorismo), formou o mundo e as cousas deste.
Esta idea influíu moito no Cristianismo,
que adaptou o Demiurgo platónico “ordenador” ao Deus cristián “creador”, é
dicir, que crea da nada.
TEORÍA
DO COÑECEMENTO (Epistemoloxía): Segundo Platón, o coñecemento é
reminiscencia ou anámnesis, palabra grega que significa “recordo”, pois a alma, antes de unirse
ao corpo, contemplou a auténtica realidade (Ideas), pero a esqueceu por
influencia do corpo, de modo que cando dicimos que coñecemos algo queremos
dicir que ao entrar en contacto por medio dos sentidos coas cousas deste mundo,
recordamos as vistas con anterioridade. Así, por exemplo, neste mundo
observamos cabalos máis ou menos imperfectos e accións máis ou menos xustas e,
deste xeito, acordámonos do auténtico cabalo e da auténtica xustiza. Isto
implica que todos os nosos coñecementos son "a priori", é
dicir, antes e con independencia da nosa
experiencia.
A idea de que existan contidos “a
priori” será tamén sostida na Modernidade polo Racionalismo, que cre que
a nosa razón é capaz por sí soa de elaborar os seus contidos sen necesidade dos
sentidos. Pola contra, tanto Aristóteles na época clásica como os
empiristas modernos rexeitarán todos os contidos innatos, afirmando que a
nosa razón é como un papel en branco
que se vai enchendo só cos datos que aportan os sentidos. Será na Ilustración,
da man de Kant, cando se sinteticen estas dúas correntes afirmando que
aínda que os nosos coñecementos parten da experiencia, non todos eles proveñen
dela, xa que o suxeito aporta unhas “formas a priori” esenciais na construción
e no coñecemento da realidade.
Hai que dicir que a epistemoloxía platónica é dualista, xa que está fundamentada no dualismo
ontolóxico, de modo que igual que hai dous mundos que se diferencian polo grao
de realidade (un aparente e outro auténtico), existen dous modos de coñecer ou tipos de coñecemento que se diferencian
polo seu grao de certeza:
- O coñecemento sensible, que estuda
a realidade material, concreta, múltiple e cambiante, baseándose nos sentidos
(no corpo), polo que é simple
opinión (dóxa), pura crenza e
saber aparente.
- O coñecemento intelixible, que
ten por obxecto as Ideas, é dicir, o universal, estable e eterno, baseándose na
razón (a alma racional), polo que constitúe
a ciencia verdadeira (episteme).
Isto é así porque para Platón, a calidade do coñecemento depende da
natureza dos obxectos coñecidos, polo que o coñecemento dos obxectos
cambiantes do mundo sensible será tamén cambiante e inestable. Ademais, este
tipo de coñecemento vén dado polos sentidos, os cales engánannos moi
frecuentemente (influencia parmenídea).
En paralelo ás distintas clases de ser
de cada mundo (as aparencias ou sombras, as cousas naturais e artificiais, os
números e as Ideas), Platón subdivide os dous tipos de coñecemento nun total de
catro graos: no coñecemento sensible
establece a conxectura ou imaxinación (a Eikasía) e
a opinión plausible ou crenza razoable (a Pistís); e no coñemento intelixible establece o
pensamento discursivo (a Dianoia)
e o coñecemento supremo (Noesis).
A conxectura ou imaxinación (Eikasía) limítase ao coñecemento das simples
aparencias baseándose só na percepción sensible (ex.: “a lúa crece e decrece”,
“os paus tórcense cando se introduce unha parte na auga”...). A opinión
plausible ou crenza razoable (Pistís) pretende comprender as cousas do
mundo sensible mediante a observación sensorial pero axustada e crítica,
intentando dar razón dos fenómenos a través de hipóteses explicativas. O
pensamento discursivo (Dianoia) constitúe o grado máis baixo de
ciencia, xa que se refire aos entes matemáticos e áinda que parte de axiomas e
emprega a dedución, tamén se axuda de representacións sensibles. Por último, o
coñecemento supremo ou ciencia suprema (Noesis), que é a visión ou
intuición directa das Ideas en si mesmas a través da Dialéctica,
método de análise conceptual que
consiste en ascender cognoscitivamente desde o mundo sensible ao intelixible e
percorrer a orde xerarquizada das Ideas ata chegar á orde mesma, á Idea de Ben.
Dito ascenso cognoscitivo é epistemolóxico e ontolóxico,
pois nel a alma humana non só adquire o coñecemento, senón que coa
contemplación das Ideas, se perfecciona a si mesma, adquirindo a súa plenitude,
o seu auténtico ser. Neste aspecto, Platón superou ao seu mestre, xa que mentres
en Sócrates a dialéctica consistía na arte do diálogo mediante o
cal ascendíase do coñecemento dos datos particulares e sensibles á esencia ou
concepto universal, en Platón trátase ademais dunha elevación no ser.
Platón dínos que os sofistas
e os políticos móvense na dóxa, e só os sabios ou filósofos logran evadirse das realidades sensibles e
elevarse dialécticamente ao mundo das Ideas.
*O seu dualismo ontolóxico e
epistemolóxico aparece reflectido no “Mito da caverna” (texto 3 da ABAU) e no
“Símil da liña” (texto 2 da ABAU).
A epistemoloxía platónica será
cuestionada polo seu discípulo Aristóteles, xa que en lugar de partir
das ideas e rexeitar os sentidos como fonte de coñecemento fiable, partirá das
cousas concretas para chegar á idea ou concepto universal e integrará no
proceso cognoscitivo os datos aportados polos sentidos, que son a
orixe do coñecemento. Estes datos serán estruturados e seleccionados polo
entendemento, elaborando así o concepto, de modo que a esencia é inmanente
ás cousas como en Sócrates e non trascendente como en Platón. Por todo isto
considérase a Aristóteles un precursor do empirismo.
ANTROPOLOXÍA: En correspondencia co dualismo ontolóxico e epistemolóxico, a antropoloxía
platónica é tamén dualista, xa que
defende que o ser humano participa dos dous mundos. Isto débese a que
nel únense a alma (pertencente ao mundo intelixible) e o corpo
(pertencente ao mundo sensible).
Platón cría que a
nosa esencia é a alma, que preexiste no mundo intelixible, pero
que debido a un erro que comete, cae a este mundo sensible, uníndose a un corpo.
Esta unión é, polo tanto, accidental, antinatural e forzada, ademais de temporal, pois a alma, en tanto que realidade intelixible, é inmaterial, espiritual e inmortal.
Durante esta unión,
a alma está prisioneira no corpo,
que é como unha tumba ou cárcere do que só provén desexos, apetitos, paixóns e
instintos que minguan as facultades
intelectuais e volitivas da alma. Por iso, esta debe buscar a súa purificación, idea que recolle do Pitagorismo
e do Orfismo, xunto coa metempsicose ou transmigración
(reencarnación). Se a
alma logra purficarse da multitude de desexos, afectos e paixóns que a
acompañan mentres se atopa unida ao corpo, unha vez morto o corpo, voltará ao
seu lugar propio (o mundo intelixible), onde permanecerá feliz contemplando as
Ideas. En caso contrario, trala desaparición do corpo, a alma "vagará
extraviada", reencarnándose noutros corpos de modo sucesivo.
Platón distinguiu tres partes ou clases de alma: a racional,
a irascible ou emotiva e a concupiscible
ou apetitiva. A parte racional atópase na cabeza e consiste nas
facultades intelectuais (pensar e querer), polo que a súa misión é o
coñecemento. A parte irascible é a que persegue os desexos irracionais do
espírito humano como a honra ou a fama, e sitúase no peito. E en terceiro
lugar, a parte concupiscible, que se refire aos apetitos e impulsos
relacionados cos praceres do corpo (comer, beber, sexo) e sitúase no ventre.
Destas almas ou partes, Platón
destacou a alma racional por ser a
propiamente humana e a que ten que controlar ás outras dúas se quere purificarse. Só ela é inmortal,
pois só ela pertence ao mundo das Ideas, mentres que a alma irascible e a
concupiscible, polo contrario, sendo dependentes do corpo, perecen coa morte
corporal.
Isto amosa como
a pesares de falar de tres partes da alma, Platón acaba dando unha visión
simplificadora da mente humana, reducindo o psiquismo humano á razón, sen
ter en conta que os desexos, apetitos e paixóns non son unicamente fenómenos
corporais, senón tamén psíquicos.
*O dualismo antropolóxico de Platón queda reflectido no
“Mito do carro alado” (texto 4 da ABAU).
Hai que dicir que Aristóteles
tamén discrepará do dualismo antropolóxico do seu mestre Platón, xa que para él,
a unión entre alma e corpo é substancial
e non accidental, o que significa que conforman unha única substancia ou ser (o
home), e que cando morre o corpo, morre tamén a alma. Para Aristóteles,
a superioridade humana non radica na súa suposta inmortalidade, senón na
súa capacidade intelectual, xa que é posuidor da alma intelectiva, que é
superior á alma sensitiva e á vexetativa, propias dos animais e dos vexetais.
ÉTICA: Platón, influído
pola pasión
socrática de investigar a Verdade e a Virtude,
sinalou, de acordo coa distinción das tres partes da alma, que cada parte posúe
unha virtude determinada: a parte racional posúe a virtude da prudencia ou
sabedoría, a irascible a virtude da fortaleza ou valentía, e a
concupiscible a virtude da temperanza ou moderación.
A sabedoría ou prudencia, como
virtude propia do intelecto, é a virtude superior que pretende descubrir a
Verdade e o Ben, e de acordo con eles, dirixir á alma cara a consecución do seu
fin propio. Consiste en saber qué debemos facer en cada caso. A fortaleza ou
valor (valentía) consiste en manter nun prudente equilibrio as nosas
aspiracións e ambicións (de gloria, diñeiro...), levar a cabo sen titubear as
decisións tomadas, e reprimir de modo correcto as agresións do noso próximo.
Por último, a temperanza ou moderación é a virtude encargada de moderar as
inclinacións dos nosos apetitos sensibles (comer, beber...).
Para Platón, a alma que actúa ordenadamente
é aquela na cal a facultade superior domina sobre as inferiores. Con
isto, Platón introduciu unha cuarta virtude: a xustiza como o ordenamento adecuado das tres partes da alma, no que cada parte exerce
a función que lle corresponde e posúe a virtude que lle é propia, o que
quere dicir que a racionalidade controla a emotividade e o apetito. Quedan así
debuxadas as denominadas posteriormente polo Cristianismo, as catro
virtudes cardinais.
Para lograr isto requírese dun dobre esforzo: un
físico e outro intelectual. O primeiro lévase a cabo mediante a ximnasia e é válido para tódolos
cidadáns, mentres que o segundo adquírese grazas ás outras artes e á dialéctica
e é reservado só para os gobernantes. Mediante a ximnasia dominamos as
inclinacións negativas do corpo, evitando a obsesión polos praceres sensuais e,
unha vez conseguido dito dominio, sentímonos capacitados para iniciar o esforzo
intelectual. Dito traballo intelectual consiste no cultivo do noso espírito a
través da práctica das artes (música, astronomía, xeometría) e da busca da
Verdade a través da dialéctica. De aquí o ideal
humanístico de Occidente: "mens sa in corpore san", espírito
deportivo e esforzo intelectual.
Platón consideraba que a maioria da xente non logra dita perfección moral, xa que se moven por
emocións e perseguen os praceres desordenadamente. Por influencia
socrática, cría que isto se podía amañar coa educación (“intelectualismo
moral”: a moral é unha consecuencia da boa educación), que é
labor do Estado, encargado de educar e clasificar aos nenos segundo probas
selectivas para adecualos a cada clase social segundo a súa natureza.
Máis tarde, as súas experiencias negativas lévanlle a
dicir na súa obra Leis que se a educación non é suficiente, hai que
obrigar á xente a levar unha vida ordenada, utilizando a violencia se é
necesario.
Aínda que Aristóteles parte
dunha análise distinta da alma humana, coincide con Platón de modo xeral
nas súas conclusións éticas, xa que defende tamén unha vida racional
dedicada á reflexión, á contemplación, como algo necesario para acadar a
virtude e a felicidade. Mantén así unha postura elitista como a do seu
mestre, que se reflicte tamén no seu concepto de xustiza distributiva
consistente en tratar por igual aos iguais
e desigualmente aos desiguais. As virtudes requiren tamén dun dobre
esforzo, aínda que Aristóteles enfatiza o esforzo volitivo necesario
para poñer en práctica o que a razón contempla como bo. Con esta idea opónse
ao intelectualismo moral socrático, xa que non chega con saber o que é o
ben, senón que hai que ter a forza de vontade suficiente para practicalo.
POLÍTICA: A política foi
unha das motivacións principais que levaron a Platón a filosofar.
Pretendía atopar un sistema de goberno perfecto que servise para eliminar
toda inxustiza da pólis.
Segundo Platón, desde un punto de vista práctico, a
política constitúe a ciencia principal e a ela deben subordinarse
todas as demais, pois a política ten por obxecto procurar o ben de tódolos cidadáns e é máis xusto e nobre buscar o ben de todos que o duns
poucos en particular. Dito Ben Común
acadarase cumprindo cada un o seu deber,
é dicir, facendo cada un o que sabe facer. O ben consiste en promover a
virtude e a xustiza, fin esencial do Estado.
O feito de que a maioría dos homes se
deixen levar pola concupiscencia e sexan moi poucos os que se rexen polo
racional buscando a contemplación da Verdade, convenceu a Platón que da mesma
maneira que na alma hai tres partes, na cidade hai tres clases de homes: os
concupiscientes, que actúan dominados polos desexos carnais e son a grande
maioría; os emotivos, tolos por conseguir a honra e a fama; e os
racionais, que tentan vivir segundo a orde das Ideas. Deste modo, o Estado
é para Platón un gran organismo que reproduce a estrutura humana e cuxa orixe
é a satisfacción das necesidades dos cidadáns. Cada parte da sociedade
debe cumprir cunha función (como cada órgano dun corpo vivo -organicismo-).
Platón cría que a pertenza a unha ou
outra clase proviña da propia natureza. Por iso, a pesar de conceder moita
importancia á educación, estaba convencido de que se o home é concupisciente,
por máis que se tentase modificar as súas tendencias, o máximo que se podería
conseguir é que praticase a virtude que lle é propia, é dicir, a moderación.
Por isto renuncia ao proxecto socrático de levar a tódolos homes cara a
excelencia e considera que o Estado xusto é aquel que consiga reproducir a
xerarquía da natureza, é dicir, aquel no que cada home cumpra a función que lle
é propia por natureza. Trátase dunha
organización estatal baseada na división do traballo.
Como os concupiscientes só poden atopar satisfación non
comer, beber... serán os produtores, é dicir, os encargados de producir
o necesario para satisfacer estas necesidades a toda a cidade a través do
traballo e do comercio. Somente eles poderán posuír propiedades, manexar diñeiro e formar famílias. Os emotivos serán os
gardiáns da cidade, encargados tanto da defensa da orde interna como das
agresións externas. Desta maneira poderán mostrar o seu valor e coraxe e
conseguir así a honra e a fama que tanto desexan. Para rematar, os racionais ou
filósofos serán os gobernantes encargados de ditar as leis e impartir a
xustiza, xa que son os únicos que coñecen esta Idea, e polo tanto, os únicos
que poden reproducila.
Os sabios ou filósofos serán os encargados de educar aos futuros gobernantes. Dita
educación será esencial no Estado, xa que Platón considera que a función e finalidade esencial do Estado é
moral: promover a virtude e a xustiza, tanto individual como socialmente,
para acadar a felicidade.
Resumindo, en Platón, tanto os homes xustos como a cidade
xusta son aqueles que reproducen o
mundo das Ideas no mundo material, é dicir, que están xerarquizados, que cada
elemento está no lugar que lle corresponde, de maneira que se realiza plenamente a Idea de Ben
(que Platón acaba identificando coa Idea de Xustiza e Beleza). Por tanto, vemos
como a xustiza non consiste en tratar a todos por igual, senón a cada
un como lle toca segundo a súa natureza. Este será o Estado Xusto e nel
todos serán felices, xa que cada un terá o que satisface as súas tendencias.
Este
sistema político platónico é, ademais de utópico, totalitario e comunitario,
pois concibe a sociedade como un todo organizado no que os individuos quedan
supeditados ao Estado; é este quen controla todo: a educación, o comercio, a
propiedade, a familia, etc. Isto atenta contra os dereitos e as liberdades
individuais que hoxe consideramos esenciais.
Como diciamos antes, Aristóteles
manterá esta visión elitista e clasista dos seres
humanos, xustificando as desigualdades naturais incluída a escravitude coa
suposta “pobreza de alma dalgunhas persoas” e como algo necesario para que os
cidadáns libres poidan manter o seu status e dedicarse á vida contemplativa.
Teremos que esperar aos pensadores cristiáns como Santo Tomás de Aquino,
quen no século XIII falará da xustiza
conmutativa, consistente na igualdade de trato para todos os seres
humanos en tanto que persoas.
AS DIFERENTES FORMAS DE GOBERNO: O proceso
histórico-político que lle tocou vivir (democracia degradada pola guerra, a
tiranía dos Trinta e a democracia restaurada que condena a Sócrates) xera en
Platón unha visión pesimista da Historia. Na súa obra magna, a República, fai unha análise das formas
de goberno que existiron e redúceas a cinco tipos fundamentais: a timocracia
(ou tinarquía), a oligarquía, a democracia, a tiranía e a que él propón, a
aristocracia.
Segundo el, ningunha das catro primeiras é boa, xa que
cada unha delas se fundamenta no imperio dunha clase sobre as outras con
finalidades egoístas: a timocracia (zymós,
enerxía, forza), constitúe un réxime político baseado na audacia, a fogosidade
e o desexo de honores e gloria dos seus gobernantes, é dicir, que os
gobernantes só se preocupan dos propios honores; na oligarquía (olígos, poucos), os gobernantes só se
preocupan pola riqueza; na democracia (démos, pobo), impera a libertinaxe e a procura do pracer; e
finalmente a tiranía, xa que a
propia exaltación da liberdade acaba por destruír a democracia, que dexenera en
anarquía e esta, á súa vez, propicia o surximento dalgunha individualidade
destacada que remata converténdose en tirano e cometendo todo tipo de abusos.
Deste modo, estes catro tipos de goberno vanse sucedendo
un detrás doutro, xa que cada un é o resultado lóxico do seu precedente. Todos
son malos, pero os seguintes son peores que os seus anteriores.
Dada esta visión da Historia como algo
decadente, Platón intentou atopar unha forma de organización da pólis xusta e estable, donde reinase
a orde e a paz e onde cada membro fose tratado tal como lle corresponde.
Concluíu que isto só se pode na aristocracia (áristos, o mellor e
krátos, poder, forza), o goberno dos sabios ou filósofos, polo que esta
é o único réxime correcto para el.
Ante a dificultade de atopar
verdadeiros sabios-gobernantes, na súa obra de vellez titulada “Leis”,
substitúe o goberno dos sabios polo goberno das leis,
sistema político no que os gobernantes están sometidos ás leis establecidas, ao
ordenamento xurídico.
Respecto a clasificación das formas
de goberno, o seu discípulo Aristóteles elaborará uhna nova
clasificación segundo dous criterios: o número de gobernantes
e a busca do Ben Común. Só este segundo criterio define as formas de
goberno correctas (a monarquía, a aristocracia e a república), fronte ás
incorrectas ou ilexítimas (a tiranía, a oligarquía e a democracia como
demagoxia), xa que para Aristóteles o número de gobernantes non é o decisivo, hai
que estudar cada pólis para saber cal
é a forma política que mellor encaixa. Aínda que a aristocracia está entre
as formas lexítimas, a diferenza do seu mestre Platón, non existe só esta forma
de organización válida; ademais, non hai ningunha ideal para todas as
circunstancias.
No hay comentarios:
Publicar un comentario