Os propongo lo mismo que en la entrada anterior, es decir, hacer un resumen de entre una y dos carillas para el segundo estándar. Para los que os interese, comparto mis apuntes al respecto.
DIALÉCTICA SOCRÁTICA E RELATIVISMO DOS SOFISTAS.
Ao comezo do s. V a.C. tiveron lugar as Guerras
Médicas, nas que os gregos, dirixidos por Atenas e coa colaboración
de Esparta, enfrontáronse ao Imperio Persa, obtendo a victoria. O éxito obtido por Atenas e a subida ao poder
de Pericles, influíron no surximento dunha nova forma social e política: a democracia.
A democracia ("demos", pobo; "crátos", poder)
favoreceu a participación nos asuntos públicos dun maior número de cidadáns e
outorgou importancia ás asembleas, discusións e debates
político-xurídicos, nos que era esencial a "habilidade dialéctica".
Para ser elixido cargo público non bastaba coa linaxe, senón que era necesario
convencer aos concidadáns sendo un orador elocuente que amosase certo coñecemento
sobre leis, xustiza, administración, Estado, etc. Este constituíu precisamente
o programa de ensino dos sofistas,
conxunto de pensadores especializados principalmente no ensino da retórica e
da dialéctica.
Inicialmente o termo "sophistés",
significaba sabio ou experto, pero a finais do s. V a.C.,
pasou a significar sabiondo ou falso sabio, embaucador ou constructor de
sofismas, debido a tres factores:
1. Ás ideas relativistas e agnósticas dos
sofistas, que chocaban co pensamento desa época.
2. Ao feito
de que percibisen retribucións
económicas pola súa actividade pedagóxica, o que chocaba coa visión
contemplativa da vida que tiñan os gregos, os cales sobrevaloraban o lecer e o
esforzo desinteresado, rexeitando o negocio e o traballo remunerado.
3. Ás críticas que sobre eles verteron
filósofos tan importantes como Platón e
Aristóteles.
Os sofistas non formaron escola, senón que
constituíron un grupo numeroso de
"humanistas" gregos con certos trazos comúns, entre os que cabo destacar os seguintes:
a) O escepticismo (do termo
grego sképsis, dúbida) e o
relativismo: a razón humana
non pode acadar o coñecemento verdadeiro sobre o mundo, só mera opinión (dóxa), cuxa forza depende da argumentación coa que se presente:
terá razón non quen exprese a realidade, senón quen consiga convencer co seu
discurso.
Un exemplo extremo é o de Gorxias, que afirmou: "Non existe a
Verdade; se existise, non a poderiamos coñecer; e se a coñecésemos, non a
poderiamos expresar nin comunicar”. Deste modo, e en oposición a
Parménides, desvincula coñecemento, realidade e discurso,
pois a realidade redúcese á realidade experimentada por cada un, que é unha
pequena parte de todo o que hai, e ademais, depende do estado das nosas
facultades sensitivas, que varía de acordo coas circunstancias e a persoa.
Deste modo, a realidade é diferente para cada un de nós, mentres que as
palabras e os coñecementos pretenden ser iguais para todos.
Deste modo, non existe unha verdade obxectiva e universal, senón múltiples verdades relativas, pois nada é en si mesmo verdadeiro nin falso
(relativismo). Neste sentido, sinalaba Protágoras que "o
home é a medida de tódalas cousas, das que son en tanto que son e das que non
son en tanto que non son".
Considérase que nisto influíu o feito de
que tódolos sofistas nacesen fóra de Atenas, e viaxasen moito, coñecendo
culturas moi diferentes.
A súa actitude escéptica levoulles a poñer
en dúbida a existencia dos deuses, inclinándose uns cara ao agnosticismo
(Protágoras: "nada podemos saber dos deuses, nin se existen ou non
existen”), outros cara ao ateísmo
(Górxias: "a crenza nos deuses foi unha invención dos gobernantes para
reforzar as súas leis nunha sanción última e universal”).
b) Preocupación polos asuntos humanos e a
educación. Cos sofistas e máis Sócrates, prodúxose un “xiro antropolóxico”,
pois deixaron de preocuparse do macrocosmos e pasaron a reflexionar
sobre o microcosmos, é dicir, sobre todo o relacionado co ser
humano, a educación, a política, a moral e os costumes. Situaron ao ser
humano no centro das súas reflexións ("o home é a medida de tódalas cousas"),
inclinándose cara aos asuntos "prácticos" e non especulativos.
As principais
causas deste cambio foron:
-
A nova situación política ateniense.
-
A desconfianza respecto da posibilidade de acadar un coñecemento seguro
sobre a natureza última da realidade, pois a filosofía anterior, na
busca do “arjé”, só conseguiu hipóteses opostas e excluíntes
entre sí.
-
O contacto continuado con outros pobos e civilizacións
(Persia, Babilonia, Exipto…).
Os sofistas critican a idea tradicional de
"areté" (virtude política), pois non crían que se herdase nin que
fora exclusiva da nobreza, defendendo que todos podémola adquirir a través do exercicio e a educación.
Por outra parte, para os sofistas a
educación tiña só un carácter formal e práctico, xa que case non
proporcionaba contidos (se todo é relativo, que ensinar?), senón habilidades
para defender a súa vontade e intereses, e para "converter en
fortes as razóns débiles".
c) Valoración da retórica e da dialéctica como medios de persuasión orientados á
defensa de intereses particulares e subxectivos (e non como ciencias ou artes destinadas a mostrar a verdade). A
retórica é “a arte do ben dicir”, de dar eficacia á linguaxe para
deleitar, persuadir ou conmover. A dialéctica é “a arte de
razoar” con discursos e de discutir.
Os sofistas instruían de modo especial na elocuencia e na erudición (saber enciclopédico
sobre leis, xustiza, administración, Estado, etc), pois era o útil nas asembleas públicas. Concibían
a palabra como un monstro con mil poderes, moi útil en
política para defender os propios puntos de vista.
d) Contraposición phýsis – nomos: convencionalismo político e moral. Na tradición grega considerábase que a
pólis, o dereito, a xustiza, do mesmo xeito que a razón (ou os animais ou as
plantas) eran produtos naturais, de modo que as leis humanas tiñan que
adecuarse ás leis da natureza (phýsis), fundamento absoluto que permite decidir
se unha acción ou lei é boa ou non.
Os sofistas, en cambio, sostiñan que a orixe e o fundamento das institucións e
normas morais, xurídicas e políticas é o acordo e a convención (nomos),
isto é, a vontade das persoas. Elas son as que crearon a pólis (primeira formulación da teoría do Contrato
Social) e as leis: o xusto e o inxusto é unha simple opinión ou convención
(nomos).
Deste xeito, defendían que unha cousa é a Natureza (phýsis) e outra distinta as
institucións, as leis e os valores (nomos).
Considérase que chegaron a esta conclusión
pola falta de unanimidade sobre o que é o bo ou xusto e a diversidade de normas
sociais e costumes que observaban no seu contacto con outros pobos e culturas.
Tras reflexionar sobre a natureza humana,
a segunda xeración de sofistas
(Calicles e Trasímaco) concluíron que só hai dúas normas naturais no comportamento humano: a busca do pracer (o neno chora cando sinte dor e sorrí cando
experimenta pracer) e o dominio do máis
forte. Isto levoulles a afirmar que a
moral vixente era antinatural,
contraria á natureza.
Estas reflexións abriron o debate posterior entre leis naturais e leis positivas, dando lugar a posturas como o iusnaturalismo e o
positivismo.
OS SOFISTAS PRINCIPAIS: Os sofistas máis destacados da “primeira xeración” foron:
- PROTÁGORAS DE ABDERA, que viviu en
Atenas e foi amigo de Pericles. Partiu dunha epistemoloxía fenomenista que lle
levou ao escepticismo e relativismo: "o
home é a medida de tódalas cousas..." e á convención e relatividade
dos valores, das organizacións sociais e do dereito...
- GORXIAS DE SICILIA (que chegou a
Atenas cara ao ano 425 a. C.) radicalizou aínda máis o escepticismo de
Protágoras na súa obra principal, titulada Sobre o Non-Ser ou sobre a
Natureza.
- HIPPIAS DE ELIS
Os sofistas
da "segunda xeración", entre
os que destacan ANTIFONTE, TRASÍMACO,
CALICLES e CRÍTIAS... desentendéronse da súa fundamentación epistemolóxica
e centráronse nas cuestións prácticas,
producíndose ás veces posicións contradictorias entre uns e outros.
---------------------------------------------------------------------------------------------------------------------------
SÓCRATES (470-399 a.C.), naceu e morreu en Atenas,
cidade da que segundo parece tan só saíu en tres ocasións. Non escribiu nada,
pois pensaba que a palabra escrita era
palabra morta, de modo que as noticias sobre as súas actividades e a súa
doutrina chegáronnos a través dos escritos dos seus discípulos (que mesturaron
as ideas do mestre coas súas, sendo moi difícil de distinguir) e doutros
pensadores contemporáneos seus, que nos ofrecen versións contradictorias.
O que é
evidente é que a actitude e o pensamento de Sócrates exerceron unha enorme
influencia no seu tempo, converténdose case desde o mesmo momento da súa morte
nun símbolo.
Sócrates fixo
do ensino ou actividade pedagóxica a misión da súa vida (igual que os sofistas);
el repetía que a esta tarefa empuxoulle o seu "daimon"
(conciencia?, iluminación divina?). A través do diálogo, debatía en calquera lugar e con calquera persoa sobre a
esencia de cada cousa, tratando, como os sofistas, cuestións humanas.
É considerado
o creador da Ética, por ser o primeiro en teorizar sobre o ben e a xustiza como conceptos universais, e
proclamar o recurso á propia consciencia:
"non é bo o que todos din, senón o que está de acordo contigo mesmo".
Estar ben coas leis e coa xustiza
significa para Sócrates estar ben cun
mesmo.
Foi acusado
de impiedade, de introducir novos deuses e de corromper á mocidade. O seu
discípulo Platón conta no Fedón que no xuízo contra el, apenas
se defendeu de devanditas acusacións, sendo declarado culpable e condenado a
morte (a beber cicuta). Aínda que puido evitar o cumprimento da condena e
fuxir, preferiu acatar a sentenza a desobedecer as leis da súa cidade.
Aínda que
certos pensadores contemporáneos como o comediógrafo
Aristófanes considerou a Sócrates un sofista máis, autores como Platón, Xenofonte e Aristóteles opuxeron de modo radical as
actitudes, os métodos e as doutrinas
de Sócrates ás dos sofistas.
Respecto dos
métodos empregados, os sofistas cobraban por ensinar, dirixíanse aos seus
discípulos mediante longos monólogos e buscaban a reacción afectiva para
persuadir e seducir pola beleza de estilo ou grandilocuencia das súas
expresións. Sócrates, pola contra, non
percibía ningún tipo de retribución polas súas actividades, levaba a cabo
os seus ensinos mediante o diálogo,
falando cos seus interlocutores, discutindo con eles servíndose de preguntas e
respostas e perseguía o rigor racional,
isto é, convencer por medio de razóns.
Respecto das súas teorías, os sofistas mantiñan posicións escépticas e
relativistas e predicaban o éxito e a utilidade, o triunfo na vida, mentres que
Sócrates ensinaba que existía a verdade
universal, unha e a mesma para tódolos seres humanos, que se expresa no concepto universal.
O MÉTODO
SOCRÁTICO: Sócrates
afirmaba o carácter innato do coñecemento: segundo el, os seres humanos
posúen ideas innatas das que non son conscientes; polo que para
investigar a verdade debemos examinar os contidos que se atopan en nós, na nosa
alma. Como indicaba a inscripción de Delfos, o principio da sabedoría radica no
coñecemento dun mesmo: "coñécete a ti mesmo".
Sócrates, que
era fillo dun escultor e dunha comadrona, comparaba o seu oficio co dos seus
proxenitores: do mesmo xeito que o seu pai non "construía" estatuas,
senón que ante un bloque de mármore eliminaba as partes sobrantes ata que
xurdise a figura que existía no interior, e a súa nai axudaba a dar a luz os
nenos concibidos con anterioridade por outras mulleres, pois ela non os
concibía; así, el tampouco ensinaba nada, senón que se limitaba a orientar
aos seus discípulos para que eles achasen as verdades que residían neles mesmos.
Deste modo, o auténtico
coñecemento consiste en traer á consciencia os contidos inconscientes
que se atopan na alma.
O método
adecuado para levar a cabo esta tarefa consiste nun proceso inductivo
que por medio do diálogo (dialéctica) e partindo da multiplicidade de
opinións comúns e prexuízos cotiáns, logra descubrir a verdade, a esencia
inmanente a tódalas cousas dunha mesma especie (expresada no concepto universal). Neste proceso podense
distinguir tres momentos:
·
Ironía, momento negativo ou refutación: consiste en facer ver aos interlocutores
que os coñecementos que crían certos
e indubidables sobre un tema eran problemáticos,
falsos ou carentes de fundamento, asumindo así a súa ignorancia, punto de
partida necesario para acadar o saber. Precisamente, a denominada ironía socrática consistía no
recoñecemento da “docta ignorancia”
por parte de Sócrates ("Só sei que non sei nada") como
unha estratexia didáctica para que tódolos presentes se sentíran máis
cómodos e sen complexos, facilitando así a participación.
·
Diálogo
ou Maiéutica, consistente no "arte de facer preguntas e respostas"
para sacar á luz a verdade que todos
levamos dentro. Sócrates nunca daba
respostas nin impartía leccións, só dirixía o curso da conversación formulando
acertadas preguntas segundo o que os seus interlocutores afirmaban. Isto facíao
porque cría que a verdade non se ensina nin se aprende, senón que a posuímos no
noso interior de modo inconsciente e temos que descubrila nós mesmos
(innatismo).
·
Definición ou conclusión xeral, consistente en plasmar nun
concepto ou tese final a verdade
descuberta. A esta chegaba a partir de argumentos disxuntivos ou condicionais, que mediante o principio de non-contradición, van
eliminando as respostas incorrectas.
Co seu
método, Sócrates petendía acadar coñecementos universais, afastando de Atenas o relativismo ético e
gnoseolóxico dos sofistas.
Para
Sócrates, igual que para os sofistas, é un feito que non hai unanimidade sobre
o significado dos termos morais, pero iso non significa que sexa imposible chegar a un acordo: cría que se nos esforzamos en dialogar e buscar
o que é a xustiza en si mesma, o ben en si mesmo, por riba das opinións
subxectivas de cada un, acadaremos un
termo válido para todas as persoas e situacións.
Sócrates
consideraba imprescindible definir con rigor os conceptos morais, pois iso
posibilitaba o acordo racional sobre
temas morais e políticos e, sobre todo, porque só sabendo que é a xustiza ou o ben, podemos ser xustos ou bos.
Esta idea deu lugar ao denominado INTELECTUALISMO MORAL, teoría que identifica o ben co saber e o
mal coa ignorancia. O ben e a virtude proporcionan a auténtica felicidade,
polo que ninguén obra mal intencionadamente, pois ninguén quere ser infeliz
ou desgraciado: quen obra mal é porque non sabe realmente o que é bo
para el, poñendo a felicidade en cousas externas e físicas, sen saber que esta
reside na alma, na conciencia virtuosa.
Para acadar
este saber necesitamos empregar a razón,
de modo que o primeiro paso cara á virtude é intelectual e despois moral.
Se coñecemos o ben nos veremos abocados a practicalo, xa que quen pensa
correctamente, actúa correctamente.
As
consecuencias sociais desta postura é que hai que educar e ilustrar ás
persoas e as faremos boas; fóra os cárceres e os castigos, pois no fondo
ninguén é culpable senón ignorante. Desde estes principios pódese entender
mellor a paixón con que Sócrates entregouse á súa misión de procurar educar aos
seus conveciños atenienses (aducar ao demos,
sen distinción de clases). Ademais, Sócrates opúxose á Lei do Talión (“ollo por ollo e dente por dente”), á
institucionalización da vinganza e da represalia: a inxustiza non se resolve
con inxutiza. É por isto polo que decicidu acatar a súa condena a morte aínda
que fose inxusta: desobedecer as leis e fuxir da cidade sería unha acción mala
e inmoral.
Respecto ao
intelectualismo moral, é evidente que unha cousa é coñecer o que debemos facer
e outra distinta facelo, pois xunto ás facultades intelectivas, os seres
humanos posuimos paixóns, emocións, instintos, intereses, etc., que poden
desviarnos do camiño moral. Agora ben, aínda que non sexa suficiente saber para
obrar ben, resulta evidente que debemos
esforzarnos en coñecer o que debemos facer, pois só así poderemos facelo.
Esta
procura dos bens do espírito baixo o dominio armónico da razón, en oposición ao
desaxuste dos instintos, provocará a
rabia de Nietzsche vinte e cinco séculos máis tarde.
No hay comentarios:
Publicar un comentario